أغرب جريمة قتل حدثت في المانيا

قضية اليوم تصنف من أكثر القضايا المرعبة في تاريخ المانيا، والسبب ان الجريمة صارت في تاريخ 31/03/ 1922 والتحقيق فيها استمر لسنة 2007 يعني استمر التحقيق لمدة 85 سنة ليش ياترى الموضوع تأخر كل هالفترة، او بالاحرى ايش هو الموضوع الي صار؟

متل ما قلتلكن في البداية في تاريخ 31/3/1922 في مدينة بافاريا الالمانية 5 اشخاص من عائلة اسمها عائلة غروبر والخادمة الي كانت تشتغل عندهم تم قتلهم داخل مزرعتهم، وتم العثور على جثثهم في حظيرة المزرعة،لحتى نفهم شلون صارت الجريمة هي لازم نرجع لورا شي 6 شهور

في هي الفترة الخادمة الي بتشتغل مع العائلة بالبيت او بالمزرعة =، كانت تسمع اصوات غريبة دائماً، تسمع اصوات نقر على الابواب او اصوات همس فكانت تحكي لأهل البيت عن الاصوات ما كانوا يصدقوها، وكانوا يقولولها انو هي عم تتوهم ومافي شي لا اصوات ولا همس ولا شي، بس البنت كانت متأكدة من هاد الشي وكل تسمع الاصوات ولهاد السبب ومن خوفها من الموضوع هاد تركت الشغل عندهم وراحت.

والوضع ضل طبيعي مع العائلة خلال المدة هي وقبل الجريمة بيوم واحد عائلة غروبر جابو خادمة جديدة تشتغل معهم ، وللاسف كان هاد اول واخر يوم الها رح تسألني ليش؟ لانو في نفس اليوم الي اجت فيه الخادمة الجديدة الاهل بدئوا يلاحظوا الاشياء الي كانت تحكي عنه الخادمة القديمة، يعني صاروا يسمعوا الاصوات الي حكت عنهم و مو بس هيك في كتير شغلات غريبة صارت بالبيت بنفس اليوم، الاب شاف جريدة بالبيت ما بيعرفها ولا مشترك فيها ولا اشتراها من قبل لا هو ولا أي شخص تاني بالبيت، وكمان ضيعوا مدالية فيها مفاتيح لابواب المزرعة وكان في عندهم غرفة مخصوصة للأدوات بيحطوا فيها كل شيء ممكن يلزمهم من فأس لتقطيع الخشب او معدات حفر والخخخ.. واذا بتقارن الاشياء هي بالشي الي رح اقوله هلا بتكتشفت انهم ولا شي عادي، يمكن ترجع تقلي مرة تانية ليش، كان الجو مثلج في وقتها وكانت الارض كلها تلج، فشافوا اثار اقدام شخص جاي من طرف الغابة الي قريبة عليهم وداخل لجوا البيت المشكلة انو مافي اثار رجعة في اثار دخلة بس مافي اثار رجعة يعني الشخص الي دخل لسته جوا ما طلع لبرا.

شاهد ايضاً الشاهد الوحيد على هذا القاتل متسلسل طفلة عمرها سنتين!

اندرياس الي هو الاب بالعيلة ستغرب كتير من الموضوع وراح لعند جارله اسمه لورانس وحكاله كل شيء صار معه من لما كانت الخادمة القديمة بالبيت، ولورانس عرض عليه انه ياخد اسلحة منشان يحمي حاله أكتر بس هو رفض وقال مافي داعي اكبر الموضوع أكتر من هيك

في ليلة هاد اليوم مع الاسف القاتل الي كان بالبيت سحب افراد العيلة واحد واحد على الحظيرة وقتلهم بالفأس، كل العيلة كانو بالحظيرة ما عدا طفل صغير عمره سنتين والخادمة الجديدة الي اجت قتلوا بغرفهم. ومع الاسف الشرطة او الناس بشكل عام ما اكتشفوا الجريمة لتاريخ 4 أبريل يعني لبعد اربع او خمس ايام والسبب بحسب اقوال سكان المنطقة انهم ما لاحظوا اي شي غريب بالمزرعة المداخن شغالة وعم يطلع منها دخنة الحيوانات عندها اكل وعم تاكل وكل شيء كان طبيعي بالمزرعة وحتى انو ساعي البريد اجا ووصلهم بريد بعد الحادثة بيوم وما حس على شيء كان كلب الحراسة موجود مكانه ومافي اي شيء متغير.

بعد اربع اايام من الحادثة هي بيجي شخص كان متفق مع العيلة انو يصلح لهم المولد الي موجود عندهم بيجي بيدق الباب ما حدا بيفتحله الباب، اول شي استغرب من الوموضوع لانو متفق معن وعاطينه موعد في هاد اليوم لازم يكونوا موجودين، بس لما ما حدا فتحله قرر انو يصلح الماكينة لحاله لانو اصلا الماكينة موجودة برا البيت مو محتاج يدخل لجوا البيت او حتى انو يجي حدا يشرحله شيء عن الماكينة لانو متل ما قلتكن كانوا حاكين مع بعض من قبل وكان عارف كل شيء ومتفق معهم انو يجي يصلح، بعد ما صلح الماكينة شاف كلب مربوط على باب البيت، الكلب ماكان موجود أول ما اجا لما شاف الكلب قال اكيد في حدا جوا البيت رجع دق الباب بس ماحدا جاوبه.

فقرر انو يروح لعند جارهم لورناس لانه اقرب جار عليهن حكاله القصة كلا وشلون الكلب كان جوا وفجاة صار برا وطلب منه انو لما يشوفهم يخبرهم انو اجا وصلح الماكينة.

بعد ما راح العالم لورانس راح على مزرعة غوبر لحتى يطمن عليهن ويقلن بقصة المصلح، اول ما وصل عالمزرعة دق عليهن الباب ماحدا فتح، مشي شوي وشاف باب الحظيرة مفتوح ولما دخل عليها شاف جثث 4 اشخاص من العيلة دخل عالبيت لحتى يشوف اذا في حدا بالبيت او لا، الغريب انو كان في اثار اشخاص موجودة بالبيت فعلا، كان في نار شغالة وفي صحون بالمطبخ واثار شخص كان عم ياكل بس مافي حدا بالبيت مافي غير جثث العيلة.

طلع من المزرعة وبلغ الشرطة ولما وصلت الشرطة وحللوا الجثث واكتشفوا انو الاشخاص ميتين من تاريخ 31 مارس، الشرطة بدئوا يعملوا تحقيقات ويسألوا ناس ويفتشوا وماقدروا يعرفوا اي شيء، اكتر شخص كان مشتبه فيه هو جارهم لورانس وهاد الشي كان لعدة اسبب، السبب الاول انه هو الشخص الي بلغ عالجريمة وشافهم، ليش ما يكون هو الي عم الجريمة وبعدين بلغ لحتى يبعد الاتهام عنه، والسبب التاني انه هو أقرب شخص عليهم بالمنطقة، اقرب شخص من ناحية المسافة اقصد.

والشيء التالت كانو انو لورانس بمرة من المرات طلب يد بنته لاندرياس ورفض، فممكن يكون هاد الشيء حفزه كنوع من الانتقام مثلاً، بس بعدين ماقدروا يثبتوا عليه التهمة والسبب كان الي حكيته قبل شوي وهو انو كان في شخص عايش بالبيت وعم يشغل النار ويطعمي الحيوانات، وفي نفس الوقت لورانس كان في بيته وفي عنده شهود انوه كان في بيته وماطلع خلال الفترة هي فماقدروا يثبتوا عليه التهمة والتحقيق ضل مستمر لسنة 2007 بدون اي جدوى ومافي اي شخص قدرت تثبت عليه التهمة.