فيديو من الديب ويب ماحدا يعرف قصته

انا متأكد أنو أغلبكم شايف الصورة هي من قبل أو حتى شايف الفيديو الكامل، لانو بالفترة مابين ٢٠١٦ و٢٠١٧ انتشر الفيديو هاد كتير في كل مكان على اليوتيوب كل الناس صارت تنشره وتقول انه فيديو من الديب ويب، وفي كتير نظريات وقصص انتشرت عنه، واشهرها بتقول ان الشخص الموجود بالفيديو تم اختطافه هو واهله من قبل عصابة من الديب ويب، وهي العصابة بدءت بتعذيب الاشخاص هدول وبالاخير قتلو اهله، والشي الي عم ياكله هو بقايا اهله….هاد الوصف لحاله كافي لحتى يوصفلك مدى قذارة الاشخاص هدول…

وانا مو هاد الشي الي بدي احكيه لانو بعرف أغلبكم بيعرف هي القصة انا هون لحتى احكيلكم القسم التاني من القصة الي ما حدا بيعرفه ولا حدا سمعان فيه، الكلام الي رح احكيه هو مو مجرد نظرية او تحليل للموضوع لا، هو كلام من لسان صاحب القصة وصاحب الشخصيات هدول الي شفتهون بالفيديو

فيديو من الديب ويب ماحدا يعرف قصته

Raymond S. Persi هو انيموتر ومخرج ومؤدي صوتي امريكي من مواليد ١٩٧٥، واحد من أشهر الأعمال الي اشتغل فيا هي مسلسل عائلة سيمبسون، وفي الفترة بين ٢٠٠٦ و٢٠٠٨ كان عم يشتغل على مشروع او على عرض مسرحي لشخصيتين اسمهم RayRay، الشخصيتين هدول هنن الشخصيات الي لابسة الجسسم الابيض والأسود

الفكرة من الشخصيتين هدول كانو يبعروا عن حالته النفسية في الفترة الي عملن فيها كان حاسس بالوحدة وانه معزول عن العالم بدء انه يعمل الشخصيتين راي راي ولهاد السبب الشخصتين ماعندهم فم لحتى لحتى يحكو فيه يعني وجودهم متل عدم وجودهم موجودين في العالم وفنفس الوقت معزولين عنه هاد الشي الي كان رايموند عم يحاول يوصله.

الشخصيات هي.فالبداية كانت مجرد رسومات بسيطة كان يرسمها على اوراق وبعدين تطورت وصارت جسم كامل وبعدين عمل الزي أو اللباس هاد الي شفته بعدين تحولت لعرض مسرحي كان يعملوه في لوس انجلس فقط، وطبعاً كان رايموند والفريق الي معه عم يحاولو يكبروا شغلهم وينشروه أكتر فكانو يحاولو يعملوا عروض في أماكن تانية خارج لوس انجلس

وفي يوم من الأيام راحو على نادي في هوليوود اسمه the key clup بعد ما الفريق خلص العرض بلشوا انهم يجمعوا اغراضهم ويحطوهم في سيارة النقل وكل واحد يروحو على بيته، فجمعوا الاغراض حطوها فالسيارة وراحو لحتى ياكلو ولما رجعوا شافو انو السيارة مسروقة ولباس الشخصيات كله مسروق ولحد الآن ما بيعرفوا مين سرق الأغراض…

بعد عملية السرقة هي في شخص بعتله رابط فيديو والفيديو هاد هو الفيديو المشهور الي فيه الشخص يلي عم ياكل من الصحن، ورابط ما كان من الديب ويب كان رابط من موقع انترنت عادي، فأول شغلة منكتشفها انو مصدر الفيديو مو من الديب ويب، ممكن بعد هاد الشي بعد ما انشهر المقطع وصار ينتشر في كل المواقع ممكن يكون وصل للديب ويب، بس هو اساس المقطع مو من الديب ويب.

يعني ممكن تكون النظرية الي بتقول انو في عصابة خاطفة الشخص واهله غير صحيحة….وانا برأي بما انهم انسرقو من قدام المسرح يعني انه على الاغلب واحد من المعجبين بالشخصيات او واحد من الجمهور سرقهم ومثل فيهم هاد المشهد لمجرد التسلية فقط

شاهد ايضاً : كيف اكتشف صاحب القناة هذه الجرائم ؟