ماكيلا بالي، فتاة 16 سنة تختفي في ظروف غامضة

تحذير: يمنع إعادة استخدام المحتوى بأي شكل مرئي أو مسموع أو مقروء دون الحصول على ترخيص، تحت طائلة الملاحقة والحذف من يوتيوب و غوغل (سترايك)لطلب الترخيص يرجى التواصل معنا

قصة اختفاء ماكيلا بالي

بعد ما تسمع هالقضية رح تصير تقدر قيمة كاميرات المراقبة ورح تعرف انهم فعلاً مفيدين جداً في بعض الاحيان، طبعاً مافي شركة كاميرات دافعتلي لحتى احكي هالكلام بس القضية الي رح نحكي فيها اليوم كل معلوماتها وكل تفاصيلها قدرنا نعرفها من خلال كاميرات المراقبة.

ماكيلا بالي فتاة كندية اختفت عن وجه الكرة الارضية في تاريخ 12 ابريل سنة 2016 وفي وقتها كان عمرها 16 سنة، امها اسمها باولا بالي وابوها اسمه غير معروف مو بس نحن ما منعرفه ماكيلا كمان ما بتعرفه، وهي المعلومة رح تلزمنا لقدام بالقصة فخليك متزكرها، لانو رح ندخل بتفاصيل كتيرة.

ماكيلا بالي كانت بنت هادية كتير وخجولة، وكانت شخصيتها حلوة وكل اصدقائها والناس الي حواليها بحبوها، كانت بتحب تعزف على الكمان وبتحب التصوير، ومتقريباً ما كان عندها عادة سيئة متل التدخين مثلاً، او اشياء تانية اثقل من الدخان، بس كانت احياناً تدعي هالشي لحتى تبين اوو كول وكذا، وفي من الايام راحت على المدرسة وهي معها علبة حبوب وصارت تقول لاصدقائها انه الحبوب هي هيه نوع من انواع (المخدر) بس بالاخير الحبوب هي طلعت حبوب لمعلاجة حب الشباب وبس.

هلأ خلينا نراجع تفاصيل اليوم من بدايتها ونشوف الفديوهات الي عنا، في صباح يوم 12 ابريل وقبل دوام المدرسة، ماكيلا بعتت رسالة لصديقيتها اكسونا وطلبت منها انو يوصلها على البنك لانو عندها مبلغ 5 الاف دولار وبدها تسحبن، بس اكسونا كانت بطريقها عالمدرسة ومابدها ترجع برجوع وتروح لعندها وتوصلها عالبنك فاعتذرت منها وما وصلتها ( وتبين فيما بعد انو حسابها مافيه هيك مبلغ نهائياً)

الساعة 8.20 جدة ماكيلا وصلتها عالمدرسة، واول ما وصلت عالمدرسة ماكيلا راحت على خزانتها ضلت واقفة شي 6 دقايق فيها وكانو كانت عم تستخدم جوالها وتتواصل مع حدا، وبعد 6 دقايق ماكيلا طلعت من الباب الخلفي للمدرسة وراحت، ولما حاولت الشرطة تعرف مع مين كانت عم تحكي وطبيعة الحكي او المحادثة الي كانت عم تعملها بس ماقدروا لانو كانت عم تستخدم تطبيقات السوشل ميديا متل الانستغرام او السناب شات، والتطبيق الي اكتر شي مشبوه هو كيك.. لذلك الشرطة كانوا شايفين انو ماكيلا عم تحكي بس ماقدروا يعرفوا شي عن المكالمات والرسائل لانها ما كانت عم تستخدم الشبكة العادية.

ماكيلا بالي
ماكيلا بالي

بعد ما طلعت ماكيلا بالي من المدرسة حبيبها السابق بعتلها رسالة وسالها ليش مالك بالمدرسة، فكان جوابها انو هي برا المدينة، ومتل ما قلتلكن بالبداية المراقبة هي الاساس بالقصة هي، لانو من خلال كاميرات المراقبة الي موجودة بكل مكان بالشوارع والمحلات شافو ماكيلا عم تحكي مكالمة مرة تانية وكانت عم تمشي بطريقها عالبنك الي رفضت صديقتها توصلها عليه، ووصلت عالبنك الساعة 8.55

وطول هالوقت ماكيلا فاتحة الخط معها مكالمة، ولما وصلت عالبنك كان لسا مو فاتح البنك فضلت واقفة قدام البنك عم تستنا يفتحوا اول مافتح البنك سكرت المكالمة ودخلت سحبت مبلغ 55 دولار من حسابها ( في فرق كبير بين 55 و5000)

وبعد ما طلعت من البنك راحت على مكتب رهان الي بيرهنوا فيه اشياء مقابل مبالغ مادية وكان معها خاتم فضة طلبت انها ترهنه، بس الخاتم كان عادية جداً وقيمته قليلة لذلك رفض صاحب المحل انو ياخد الخاتم منها.

طلعت من المحل الساعة 9.15 وراحت على مطعم تيم هورتونز طلبت مشروب بس وضلت قاعدة فيه لحالها وطول الوقت عم تستخدم الموبايل، وبداخل المطعم صار كتير اشياء غريبة، بعد فترة قصيرة من استخدام الموبايل ماكيلا طفت الموبايل وسحبت منه البطارية ،لمدة دقيقة او دقيقتين وبعدين رجعت شغلته وكملت استخدام عادي، وبعدها صارت تلفت على الباب كل شوي كانها عم تستنا حدا يجي لعندها ولكن لما صارت الساعة 9.23 ماكيلا ملت وطلعت من المطعم.

طلعت من المطعم فترة قصيرة جداً ورجعت دخلت مرة تانية، بس لما دخلت ما قعدت ضلت عم تفتل بالمطعم وكانها عم تدور على حدا، فتلت شوي ورجعت طلعت مرة تانية، طلعت راحت مشيت شوي بالشارع ورجعت دخلت على نفس المطعم مرة تالتة ورجعت تستخدم الموبايل وتحكي فيه، لما حاولت الشرطة تشوف سجل المكالمات على خطها ما كان فيه لا مكالمات صادرة ولا ورادة من خطها ابداً لانو متل ما قلكن كانت عم تستخدم تطبيقات لحتى تحكي وما استخدمت الشبكة العادية

الساعة صارت 9.49 وماكيلا لستها قاعدة بالمطعم بس هالمرة غيرت طريقة قعدتها وصارت مواجهة للباب والشباك لحتى تشوف اذا الشخص الي عم تستنها وصل او لا، وطبعاً مرة تانية ماكيلا طول الوقت عالتلفون عم تحكي مكالمة وبعد 14 دقيقة واخيراً ماكيلا انهت المكالمة واستخدمت الشبكة العادية لحتى تبعت رسالة لصيدقتها شيبلي، الرسالة الي بعتتها كانت قصيرة كتير، قالتلها مرحبا انا محتاجة مساعدة وبعد عشرين دقيقة بعتتلها رسالة تانية قالتها خلص انسي الموضوع دبرت حالي، شيلبي ما جاوبت عالرسالتين لانو جوالها كان بالبيت وهي بالمدرسة فما شافت الرسائل لبين مارجعت عالبيت.

ماكيلا بالي

شاهد ايضاً : أغرب جريمة قتل حدثت في المانيا

لحد الان ماكيلا بالمطعم ومضي ساعة تقريباً وهي كالعادة عالموبايل عم تحكي وتبعت رسائل، ولما صارت الساعة 10.40 قامت الطاولة الي كانت قاعدة عليها، وراحت عالطالوة الي جنبها في هي الطاولة كان في مرة عجوز شوية قاعدة فيها، عالكاميرا واضح انهم عم يحكوا حديث وما سكتوا ابداً وبعد ما خلص الحديث ماكيلا تركت المطعم ورجعت عليه مرة تانية، ولما الشرطة سالو المرة الي كانت قاعدة معها قالت انو ماكيلا طلبت منها انو تحجزلها غرفة بفندق رامادا بس المرة رفضت طلبها باحترام وقالتلها لا

لذلك طلعت من المطعم وصارت تمشي بالشارع واثناء المشي هاد ماكيلا مشيت من قدام الفندق الي طلب من المرة تحجزلها غرفة فيه مرتين، وللاسف الوقت بين الساعة 10.45 و11.55 ما منعرف وين راحت ماكيلا لانها عالاغلب راحت على منطقة ماكان فيها كاميرات، او بالاحرى الفيديوهات الي قدرت تسحبها الشرطة ما ظهرت فيها ماكيلا بالوقت هاد فماحدا بيعرف تحركاتها خلال الساعة هي

لحسن الحظ قدرنا نعرف شيء واحد من الاشياء الي عملتها خلال هي الفترة والي هو انو الساعة 11.34 ماكيلا بعتت رسالة لصديقتها شيلبي كتبتلها فيها بشوفك وقت الغدا، ورجعت على مدرستها، ما طولت بالمدرسة ضلت فيها دقائق قليلة، وفي هالمدة القصيرة شافت اصدقئها سألوها وينك انتي وين رايحة، قالتلن لازم اروح لانو عندي موعد باص لانو رايحة رحلة على منطقة اسمها ريجينا، وبعد ما حققت الشرطة بالموضوع هاد تبين انو ماكيلا كانت كتير تحكي هيك قدام رفقاتها انها رح تروح على مدينة ريجينا وكانها كانت حلم لهم انهم يتركوا مدينتهم ويروحوا على مدينة تانية اكبر واحسن وهي المدينة هي مدينة ريجينا

وبعدين الشرطة عرفت انو ماكيلا حكت نفس الكلام هاد لحبيبها السابق، بعتتله رسائل قالتله انو هي زعلانة ورح تروح رحلة عائلية على مدينة ريجينيا، لحد الان كل هالتفاصيل بتخليك تقول انو ماكيلا هي الي عم تخطط تروح عادي

ويبدو انو ماكيلا هي المرة كانت عم تحكي الحقيقة لانو بعد ما طلعت من المدرسة راحت على مكان اسمه bus deport الي وسالت عن موعد الباص الي رح يروح على مدينة ريجينا، لما قلها الموظف انو اقرب باص بعد خمس ساعات، راحت دخلت على مطعم شركة الباصات وضلت تقريباً 45 دقيقة قاعدة بالمطعم قبل ما تطلع صارت الساعة 1 ماكيلا طلعت من المطعم ومارجعت عالمدرسة ولا رجعت عالبيت ولا رجعت على اي مكان تاني ماكيلا اختفت

لما صار وقت الصرفة من المدرسة، جدتها الي وصلتها الصبح راحت لحتى ترجع تاخدها من المدرسة، ولما راحت وماشافت حفيدتها عرفت انو في شي غلط بالموضوع، سالت عنها بالمدرسة وصارت تحاول تتصل فيها ويبعتولها رسائل بس مع الاسف مافي جواب ومافي اثر لماكيلا، بهالوقت بلغوا الشرطة انو بنتهم مفقودة وضلوا يتصلوا فيها على امل انها تجاوب في اي لحظة ولكن ما كان في اي جواب ولما صارت الساعة 7 الصبح من تاني يوم موبلها طفي وصار يطلع خارج الخدمة

بعد ما الشرطة جمعت الفيديوهات الي شفناها، قعدوا فترات طويلة يحللوها ويحاولو يعرفوا اذا عرفت حدا او شافت حدا او حدا اذا كانت مزعوجة او لا فهنن حاولوا يدروسوا كل شيء بالفيديوهات حتى ملامح وجها، فبعدها عرضوا الفيديوهات نفسها على اصدقائها بالمدرسة بما انو صديقتهن واغلب الوقت معهن ممكن يلاحظو شيء ما لاحظته الشرطة، وفعلاً لاحظو شي.

اصدقئها قالو انو هي بحياتها ما اجت عالمدرسة بحقيبة ظهر كانت دائماً تجي بالحقيبة الي بتنشال بالايد، هاد الشي بيرجع بياخدنا لانو ماكيلا من لما طلعت من البيت كان عندها نية فعلاً انو تروح على شي مكان، والفيديوهات الي شفنها بتثبت هاد الشي كانت عم تقول لاصدقائها انو رح تروح، وراحت سالت عن الباص الي بروح على منطقة ريجينا، بس ماكيلا ما اشترت تزكرة باص ولا ركبت باص !

شيء تاني مثير للاهتمام قالوه اصدقاء ماكيلا للشرطة انو ماكيلا كانت عم تحكي مع شخص اسمه كرستفور والمفروض انو يكون في موعد بينهم ويلتقوا ببعض، بشكل سريع جداً وصلت الشرطة لكرستفور وحققوا معو وفتشوا بيته كمان بس ما كان في اي اثر لماكيلا عنده او حتى اثر يدل انها اجت لعنده من الاصل.

ومتل ما قلتكن قبل شوي انو ماكيلا كانت تسخدم سناب شات وكيك اكتر شي للتواصل، الشرطة ما كانت قادرة تعرف اي معلومة عن المكالمات والرسائل الي كانت عم تعملها في ساعاتها الاخيرة قبل ما تختفي

هلأ وصلنا على مكان ممكن نقول انو القضية زادت صعوبة كتير، لانو المعلومات الي عنا بتقول انو فعلاً ماكيلا كان عندها نية انها تسافر لحالها، وبنفس الوقت بحسب الفيديوهات الي شفناها بالمطعم انو ماكيلا كانت عم تنتظر حدا، فما منعرف اذا اختفائها صار فعلاً لانو هي بكامل اردتها راحت على ريجينا او الشخص الي كانت عم تستناه اله علاقة بالموضوع

في كتير نظريات وملعومات عن القصة ممكن بكل بساطة يكون الحل فيها، واولها صار في شهر شباط من نفس السنة وتحديداً في يوم الفالنتاين، في يوم الفالنتاين ماكيلا استلمت بوكيه ورد على المدرسة، الغريب انو المرسل كان غير معروف او ماكيلا قالت انو ما بتعرفه، وبوكيه الورد نفسه كان مغلف بطرد كرتوني وواضح من الطريقة الي مغلف فيها انو مطلوب اونلاين، وهاد الشي خلاني افكر بالفكرة هي بما انو الطلب مطلوب عن طريق الانترنت ممكن يكون المرسل من خارج المدينة هي من مدينة ريجينا مثلاً ويكون نفس الشخص الي كانت عم تنظره بالمطعم او الي كانت رح تروح على ريجينا منشانه. وشيء جانبي بخص الموضوع هاد انو الشرطة عرفت مين الشخص المرسل بس ما صرحت عن معلوماته ابدا لا مين هو ولا من وين ولا اي شيء بس الشرطة بتعرف مين المرسل

الظرية التانية هي علاج حب الشباب الي قلتلكن عليه بالبداية، ماكيلا كانت تاخد الدوا هاد بشكل منتظم دائما وما ممكن تتركه لانها كتير بتعاني من حبب الشباب وما بتحب شكلها بحب الشباب فكانت تاخده معها دائماً وين ماراحت وهاد السبب الي خلاها تاخده معها عالمدرسة باليوم الي قالت لرفقاتها انو هاد مخدر، بحسب كلام الناس عن الموضوع هاد انو الدوا الي كانت تشربه ماكيلا معروف بانه له اثار جنبية سييئة وبتادي الى مشاكل بالصحة النفسية، يعني ممكن يسبب اكتئاب او تقلبات مزاجية كتير، واذا لساتكن متزكرين ماكيلا قبل ما تختفي بعتت رسالة لحبيبها السابق انو هي حزينة، فمممكن يكون الدوا هاد هو سبب المشاكل كلها وهو الي خلاها تعمل شي بحالها او خلاها تقرر انها تختفي عن العالم كلو!

والناس ربطت هاد الشي بحاسب انستغرام كان باسم ماكيلا، والحساب كان فاضي مافيه اي منشورات بس كان مكتوب فيه بالبايو غود باي.

وعلى سيرة الانستغرام، ماكيلا قبل ما تختفي نشرت منشور على الانستغرام حطت فيه حسابها على السناب شات وكتبت عليه انا ابحث عن عن اصدقاء على السناب شات لاني لاملك اصدقاء في العالم الحقيقي، وصديقتها شيبلي ارسلتلها رسالتين بالسناب شات بنفس اليوم الي اختفت فيه بس ماكيلا مافتحت الرسائل، وبعد فترة 3 اشهر تقريباً من اختفاء ماكيلا الرسائل الي بعتتهن شيبلي انفتحوا يعني طلع بالسناب شات انو الرسالة opened وكانو شخص ما عم يستخدم الحساب، الي عملته شيبلي انو رجعت بعتتلها مرة تانية على امل انو هي تكون الشخص الي عم يتسخدم الحساب بس مع الاسف هالمرة ماكان في جواب ولا حدا فتح الرسالة.

واخر نظرية رح نحكي فيها هي نظرية ابوها، الي قلتكن انو ما امنعرفه بالبداية، بعد ما انتشرت قصة ماكيلا والناس عرفت انو اختفت والشرطة عرضوا مبلغ 50 الف دولار للي بيجبلهم ملعومات حقيقة او دلائل حقيقة عن ماكيلا، في مرا اجت وقالت انو شافت ماكيلا ، عم تمشي مع شخص ضخم في نفس اليوم الي اختفت فيه،وبعد ما اعطت المواصفات للشرطة، حاولو يعملو سكتش او يرسموا المواصفات لحتى يوصلوا للشخص المزكور وفعلاً رسمو ووصلو لشخص بنفس المواصفات الي قالتها المرا بس لما حققوا معو نكر وقال انو ما بيعرف ماكيلا ولا شافها من قبل.

فهي النظرية الي طلعت من راسي بتقول، انو بما انو المرا الي اعطت مواصف الشخص الضخم للشرطة طلعت مواصفات شخص حقيق فعلاً، وبما انو ماكيلا ما بتعرف ابوها، ممكن فعلاً يكون هاد الشخص هو ابوها ويكون هو الشخص الي كانت عم تتواصل معه طول الوقت وقررت انو تروح تعيش معه وتغير ارقامها وتغير كل شي في حياتها..

مع الاسف ما منعرف اذا هاد الكلام صح او لا ، ولا منعرف وين ماكيلا، فكل شي منقدر عليها هو انو ندعيلها انو تكون بخير وترجع لاهلها.

اترك ردّاً

لن يتم نشر عنوان بريدك الإلكتروني. الحقول الإلزامية مشار إليها بـ *