واخيراً تم القبض على قاتل توباك شاكور بعد 27 سنة!

واخيراً وبعد انتظار وتحقيقات دامت 27 سنة الشرطة الأمريكية تعتقل الشخص المتورط في مقتل توباك

مقتل توباك شاكور كان لغز من أكبر الألغاز الي بقيت بدون لحل لأكثر من 27 سنة

ولكن واخيراً اجا الحل والسبب كان اعترافات من المتورط بالجريمة بنفسه!

لذلك ابقى معي للنهاية لحتى تعرف مين هو قاتل توباك وليش أم توباك هي الي اعطت القرار للمشفى بانهاء حياته!

قصة توباك باختصار

توباك شاكور هو رابر أمريكي من مواليد 1971، ويعتبر من أكثر الرابرز المؤثرين الي يومنا هذا حتى بعد ما صارله 27 سنة ميت

بدأ مسيرته في الراب سنة 1987 يعني لما كان عمره 16 سنة بس وأول غنية ظهر فيها كان اسمها Same Song

هي الاغنية كانت انطلاقته في عالم الهيب هوب ومن بعدها قرر ان يخلي الهيب هوب مهنته الأساسية في الحياة واستمر بانتاج الأغاني والألبومات مع شركة انترسكوب حتى دخل بمشاكل قانونية واتهامات باعتداء جنسي على فتاة سنة 1994

 ومع ان توباك رفض هالاتهامات وخلا القضية تستمر حتى النهاية لإصراره على برائته، إلا أنه في النهاية تمت إدانته والحكم عليه بالسجن لمدة كانت راح توصل لخمس سنين

وفجاة ظهر شخص اسمه suge knight هوقرر أنه يطلع توباك من السجن بكفالة مالية، وبالفعل دفع 1.4 مليون دولار، وخرج توباك من السجن.

السؤال يلي خطر على بال الجميع هلأ، هو مين suge knight؟ وليش طلع توباك من السجن؟ 

شوغ نايت هو المدير التنفيذ لشركة Death row للانتاج الفني، وهي نفسها الشركة المنتجة لرابرز كانو ملوك التسعينات متل دكتور دري وسنوب دوغ، أما ليش طلع توباك من السجن؟ فهو بكل تأكيد ليكسب ولائه من جهة، وليضمه لشركة انتاجه من جهة تانية ويطلع منه ملايين، وبالفعل هذا يلي صار، وأكثر ألبومات توباك مبيعًا هو all eyes on me يلي انتجه مع ديث رو في ١٩٩٦.

ولازم تعرفوا انو فترة التسعينات في أمريكا كانت عبارة عن فترة سيطرة العصابات على كل شيء في البلد

كل شيء حرفياً، حتى شركة الانتاج ديث رو كانت محتاجة تكون ضمن عصابة معينة لحتى تحمي حالها.

لانو ماكان عندهم حل وسط ابداً اما انك تكون بعصابة وتحمي حالك او ما بتكون بعصابة وتتبهدل

والعصابة الي كانت تحمي شوق نايت هي عصابة اسمها Bloods وشوق نايت كان معروف عن ارتباطه بالعصابات ليحمي استثماراته وسيطرته على عالم موسيقى الهيب هوب، وصار معروف عن جماعة ديث رو أنه وراهم gangstas تقال.

East Coast vs West Coast

هي المعركة أو الـbeef متل ما بيسموها الأميركان، هي من أكبر الخلافات الموسيقية يلي صارت على الإطلاق، وحرفيًا صار فيها كل شي أكشن ممكن تتخيله، الدسات والأغاني هي أسهل شي فيها، ووصلت الأمور للسرقة والقتل والاغتيالات.

كيف بلشت هالمعركة؟ هي بالبداية كانت منافسة عادية، رابرز نيويورك بيحكو عن حالهم احسن، ورابرز لوس أنجلوس بيتمسخروا على جماعة نيو يورك وهكذا.

بس لما كان توباك بالسجن قبل ما يطلعه شوغ نايت بكفالة، كان في غنية طلعت على الراديو اسمها who shot ya وهي غنية نزلها notorious b.i.g ويلي فكرها توباك دس تراك عليه، وانشحن كتير على biggy يلي كان بيمثل الايست كوست أو الساحل الشرقي الأمريكي، وقرر أنه ينتقم.

خاصة أنه توباك بلش يربط أحداث صارت معه ببعضها، متل حادثة سرقة القلادة تبعه، يلي تبعها محاولة اغتياله بخمس رصاصات، وتوباك صار يتهم الايست كوست بمحاولة اغتياله الأولى

وبالمناسبة توباك تعرض لمحاولتين اغتيال فاشلتين قبل ما يتم اغتياله فعلًا في المرة التالتة يلي راح نحكي عنها كمان شوي.

فغنية who shot ya نقلت البيف بين الايست والويست كوست إلى مستوى جديد، ونشر توباك دس تراك ما زال يعتبر لحد اليوم من أقوى الدسات في التاريخ، وهو hit em up يلي مسح الأرض فيه بشوارب بيغي وبافي وكل شي بيقول انا ايست كوست حتى ناس مالهم علاقة لحقهم طراطيش.

حادثة اغتيال توباك

وصلنا هلأ على ٦ سبتمبر ١٩٩٦، والأمور شاعلة بين الايست كوست والويست كوست، وفي كتير أمور معلقة ومو محلولة بيناتهم، ويلي صار هو كالتالي:

حضور مباراة مايك تايسون: كان معروف عن توباك أنه من محبي مايك تايسون ومشجعينه، وحتى أنهم كانوا أصدقاء، وفي هذا اليوم كان توباك عم يحضر مباراة ملاكمة بين مايك تايسون و بروس سيلدون في ساحة MGM Grand Garden Arena، وكان عم يحضر هالمباراة ناس من كل أنحاء أمريكا، ونعم في منهم ناس من أعداء توباك.

القتالة بعد الماتش:

بعد انتهاء الماتش تبع مايك تايسون، خرج توباك وشوق نايت من المبارة وبنفس الوقت كان طالع اورلاندو اندرسون الي هو واحد اعضاء عصابات الeast coast، وطبعاً منعرف توباك وجماعته هم من الwest coast

فلما اورلاندو شاف توباك جمع مجموعة اشخاص مجهولين الهوية، وهجموا على توباك وجماعته في اللوبي تبع الفندق الي كانوا فيه

ودب خلاف وفوضى كبيرة جداً بينهم، ومشهد بتحسه طالع من لعبة GTA San andreas 

الاغتيال في السيارة: بعد هالمعركة يلي صارت، اورلاندو خبر اعضاء عصابتو بالمشكلة الي صارت وطبعاً العصابات ما عندن رحمة ابداً ذلك كانوا مخططين أنهم ينتقموا من توباك

المهم غادر توباك وشوق نايت بسيارة BMW، وهنن واقفين على إشارة حمرا على أوتوستراد Flamingo Road و Koval Lane، وأثناء وقوفهم على الاشارة بتجي سيارة كاديلاك لونها أبيض بتوقف جنب سيارتهم، وبيطلق النار منها على توباك.

صابوه بأربع رصاصات، واحدة في صدره، وواحدة في ايده، وواحدة في حوضه، وحتى شوق نايت يلي كان قاعد جنب توباك وعم يسوق السيارة انصاب بشظايا في راسه ولكن ما كانت إصابته خطيرة

ولحد الآن هو موجود وعايش، بالسجن.. اذا بتحبو نعمل فيديو عن قصة شوق نايت خبروني بالتعليقات.

نقل توباك إلى المستشفى ووفاته: وبعد إطلاق النار، تم نقل توباك إلى المستشفى، وخضع لعملية جراحية معقدة في محاولة لإنقاذ حياته. 

وظل في حالة حرجة لعدة أيام لحتى فارق الحياة.

في رواية طلعت عن أنه كان في احتمال أنه توباك ينجو لكن والدته هي يلي رفضت هالشي، والسبب أنه كان راح يكمل برئة واحدة بس، وصوته راح يختفي للأبد، وممكن يفقد أكتر من اصبع من أصابيعه، 

وبما أن الأم بتعرف عزة نفس ابنها وفخره، وصعوبة الحياة يلي راح تكون اذا بيكمل بدون صوت، خاصة أنه موسيقي، فطلبت من الأطباء أنه يتركوه يروح لحتى يرتاح.

هي الرواية غير مؤكدة بشكل رسمي، ولكن نابليون يلي كان شريك لتوباك في فرقة outlaws حكا عن صحة هالفكرة بمقابلة سابقة عملها مع Dj Vlad

عرض هذا الشورت

التحقيق في قضية توباك شاكور

التحقيق باغتيال توباك من أعقد عمليات التحقيق بالاغتيال يلي تمت حتى اليوم.

 وحتى بعد اعتقال كيفي دي كمتهم رئيسي بالاغتيال، القضية ما زالت مفتوحة، وما تم تقديم أي نتيجة حاسمة فيها حتى الآن، ومافي أكتر من الروايات والقصص يلي طلعت عن هالتحقيق.

حتى أنه نتفليكس أنتجت مسلسل كامل عن قضية اغتيال توباك وبيغي، وفي كتير وثائقيات وكتبت انعملت ولسا عم تنعمل عن هالموضوع، راح أحط كل المصادر والمراجع المتعلقة بالقضية بمقال تفصيلي على المدونة عندي بإمكانك تشوفه من الرابط بالتعليقات.

هلأ من سنة 1996 إلى 2023 قضية توباك كانت من اكثر القضايا جدلاً في العالم، وكان في كتير نظريات عن مين قتل توباك، او مين اله مصلحه بقتله.

وتم اتهام اشخاص متل بيغي وباف دادي انه يكون هو القاتل او المسؤول عن القتل بسبب البيف الي كان بينه وبين توباك

او حتى انه شوق نايت نفسه الشخص الي دفع مليون و400 الف لحتى يطالع توباك من السجن، وضمه الى شركته وصار ينتجله اغاني

كمان تم اتهامه بانه يكون هو المسؤول عن الجريمة.

شاهد المزيد من قصص الرعب هنا

ولكن كل هالقصص الي طلعت ما كان في الها اساس، او الادلة كانت جداً ضعيفة لدرجة أنه ما تم اعتقال أي شخص بشكل رسمي طول هالمدة

ولما الشرطة تاخد النظريات هي وتحقق فيها ما كانت توصلهم الى اي حل لذلك كانوا يسكروا الموضوع

وبالفعل التحقيق بالقضية انحط على الرف اكتر من مرة وحتى ان المحققين المسؤولين عن القضية كمان تغيروا أكتر من المرة

وبالرغم من كل الجهود هي مازالت القضية غامضة ومالها حل

الى ان وصلنا الى سنة 2018 

قاتل توباك

في سنة 2018 المتهم كيفي دي كتب كتاب اسمه compton street legend، داخل الكتاب وصف الحادثة الي صارت يوم مقتل توباك وشو صار داخل سيارة الكاديلاك يلي تم اطلاق النار منها

حرفياً كيفي قال انه كان هو بالسيارة بالمقعد الامامي وكان في شخص بيسوق السيارة اسمه t brown، وشخصين بالمقعد الخلفي هنن اورلاندوا اندرسون والتاني اسمو dre 

وسيارتهم كانت قريباً جداً من سيارة توباك لدرجة ان كيفي نظر لشوق نايت الي كان عم يسوق سيارة توبك نظرة مباشرة يعني كانت عينه عليه

وبعدين هو كان معه حقيبة فيها مسدس فتحها ورماها لورا عالمقعد الخلفي، وواحد من الاشخاص الي كانوا ورا سحب المسدس وبدأ باطلاق النار على توباك

طيب هلأ رح تقول حلو كتير هاد اعتراف واضح وصريح بالجريمة، وبمجرد ما نعتقل الاشخاص الي كانوا بالسيارة رح تنحل القضية صح؟؟

صح؟؟… للأسف مو صح لان كل الاشخاص الي كانوا في السيارة وقت الحادثة ماتوا، والشخص الوحيد الي ضل عايش لحد الان هو كيفي دي الي كتب الكتاب

وكيفي ما اكتفى بس بالكتاب بل استمر بالظهور في مقابلات وبودكاستات وكان يحكي عن نفس الموضوع بشكل عادي جداً!!

والي لازم تعرفوا انو كيفي دي كان ياخد معه محامي على المقابلات الي بيروح عليها لحتى يعمل كونترول على أي كلمة بيحكها.. فبنقدر نقول انه كيفي دي كان عارف حاله انه ممكن يتورط لذلك كان حريص

او كان مفكر حاله انه حريص!

فيديو من بودكاست

المدانين بالجريمة.

كيفي دي: هو العقل المدبر وراء الجريمة، وخطط لهالعملية فزعة لابن اخوه يلي هو اورلاندو انديرسون بعد ما عمل المشكلة يلي عملها مع توباك بعد مباراة مايك تايسون.

اورلاندو اندرسون: بحسب كيفيدي نفسه، فأورلاندو اندرسون، يلي مات في 29 مايو 1998 هو يلي أطلق النار على توباك.

تي براون: هو شوفير سيارة الكاديلاك البيضاء يلي كان فيها المجرمين، وهو جزء من العصابة، وبالتالي جزء من الجريمة.

ديندراي سميث: وما منعرف ليش كان موجود بالسيارة او مانعرف اذا كانوا مخططين انه ينفذله شي حركة… كان معهن بالسيارة هيك بالمعية بس

بعد ٢٧ سنة من الجريمة، اليوم توباك ميت، مع انه في كتير ناس عم تقول انه ممكن يكون عايش في جزيرة بعيدة.

المجرمين يلي كانو بالسيارة كلهم ماتو ما عدا كيفيدي يلي صار اليوم في قبضة العدالة الامريكية، وممكن اعترافاته تطلع معلومات جديدة عن القضية.

اشتركوا بالقناة لحتى توصلكم أي تحدثات بخصوص اعترافاته

شوق نايت بعد ما كان امبراطور العصابات وصناعة الموسيقى، اليوم عم يقضي عقوبته بالسجن لمدة ٢٨ عام بعد ادانته بجريمة قتل أحد رجال الأعمال من كومبتون.

والدة توباك توفت في ٢٠١٦، ويلي بقيان من عيلته هو أبوه البيولوجي، وأخ وأخت له من أمه.

برأيك هل راح يتم اغلاق قضية مقتل توباك أخيرًا؟ أو ممكن يطلع تفاصيل جديدة؟  خبرني عن رأيك بالتعليق، وهذا الفيديو أخذ مجهود كبير لحتى يتم انتاجه بهالسرعة، فلا تبخلو علينا بالدعم باللايك والمشاركة.