قضية وفاة الممثلة الكورية اوه ان هاي كاملة
اوه ان هاي
اوه ان هاي (oh in hye) ممثلة كورية عمرها ٣٦ سنة تحولت الى يوتيوبر في الفترة الاخيرة، وكانت تنشر فيديوهات فيها نصائح للبنات على شكل فلوقات، وفي يوم ١٣ سبتمبر ٢٠٢٠ صديقتها بتجي لعندها زيارة على البيت وشافت اوه ان هاي بالارض فاقدة الوعي.. طبعاً اكيد صديقتها اسعفتها فوراً ولكن مع الاسف في يوم ١٤ سبتمبر تم اعلان وفاة اوه ان هاي وبحسب تقرير المشفى سبب الموت كان سكتة قلبية نتجت عن عملية انتحار، وما اعطوا اي تفاصيل تانية عن الموضوع.
بالنسبة لشخص مشهور ومعروف بين الناس الموضوع ممكن ياخد وقت لحتى ينتسى او يمكن ما ينتسى ابداً، وخصوصاً الأشخاص الي بيحبوها ، بعد اعلان خبر وسبب وفاتها الناس بدأت تطالع نظريات عن سبب وفاة الممثلة اوه ان هاي وهي النظريات كانت مدعومة بدلائل كتابية وبصيرية يعني في فيديو وفي كتابة كانت الممثلة اوه ان هاي شخصياً ناشرتها.
في قناتها على اليوتيوب كانت دائماً لما تنشر فيديو تكتب جنبه رقمه وفي اخر فيديو نشرته كان فيه خطأ بسيط هاد الخطأ لفت انتبها الناس كلها، اخر فيديو نشرته كان رقمه ٤٨ مع العلم انو الفيديو الي قبله رقمه ٤٥ اما في فيديوهين محذوفين قبل هاد الفيديو او انو اوه ان هاي كانت متعمدة تكتب هاد الرقم لسبب معين، وفي احتمال تاني وهو انو نعتبر الرقم هو مجرد غلط عادي وندخل نشوف الفيديو.
شاهد ايضاً: أناتولي موسكفين صاحب الدمى البشرية! القصة الكاملة
الفيديو بيكون طبيعي لمدة ٤٨ ثانية، وبعد أول ٤٨ ثانية بيصير في غلتش بالفيديو، والغلتش بيستمر من الثانية ٤٨ الى ١:٤٦، مع انو الفيديو فيه غلتش الى انو الصوت ما تأثر بالغلتش، والأغرب من هيك انو بالدقيقة ١:٣١ في صوت غريب بيطلع هاد الصوت كان بطبقة عالية جداً وواضح أنه تم اضافته على الفيديو من مصدر خارجي يعني مو من اساس التسجيل، وبناء على الترجمة الي ترجموها بعض الاشخاص قالو ان الجملة هي معناها:Im going to die.
في كتير ناس قالو انو الترجمة ممكن تكون غلط وغير صحيحة، لانها كانت عبارة عن ترجمة آلية على ما اعتقد والجملة تم ترجمتها الى اللغة الانكليزية وانا جبتلكن ياها من الانكليزي الى العربي فأتحمال انو تكون الترجمة غلط وارد جداً ولكن مو هاد الشي الوحيد الغريب الي كان بالفيديو، الشيء الأول هو ان اوه ان هاي كانت كاتبة بعنوان الفيديو جملة بمعنى لاتشوفو الجزء الخربان من الفيديو يعني هي كانت شايفة انو الفيديو فيه مشاكل بعملية المونتاج ولكن مع ذلك نشرته، وشيء تاني هو ان الغلتش استمر لمدة دقيقة تقريباً بس الساعة الي وراها مشيت حوالي ٣ أو ٤ دقائق
الحركة الي صارت بلغلتش اوحت ان او ان هاي عم تحاول تطعن رقبتها بالمشط وقالت انها ممكن تموت بجملة تم اضافتها بشكل خارجي للفيديو، ما اعتقد ان الموضوع مجرد صدفة، وبالمناسبة اوه ان هاي ماتت بعد ٤٨ ساعة من تاريخ نشر الفيديو، فبناء على الأمور هي الناس كانت مقتنعة أنو هاد الشي مو مجرد صدفة
واذا كنت الموضوع رح ينتهي هون فأنت غلطان، في الليلة الأخيرة الها قبل ماتموت نشرت بوست على الانتستغرام كان عليها صورة وردة، والكتابة الي مكتوبة بالكابشن يمكن تثبت كل الكلام الي قلته قبل شوي….يمكن أو يمكن تكون دليل على موضوع تاني.
أعتقد ان الجميع يرى هذا بما في الذلك الشخص الذي قال عني مجرد قطعة لحم، أعتقد انه يجب علي أن افضحك. بسبب الجملة التي قلتها لا يمكنني أن اصدق أي شيء يخرج من هذا الفم.
والترجمة هي هي ترجمة الكلام يلي تترجم من الكوري الى الانكليزي، يعني في احتمال يكون في اغلاط بالترجمة
وبالمنشور نفسه كان في تاغ لشخص اسمه وانج هو وهو محامي مشهور وشخص نشط على مواقع التواصل الاجتماعي وبما انه المنشور كان غريب كتير والكلام الي فيه غير مفهوم كل متابعينها صارو يسألوها عنه ويحاولو يستفسروا عن القصة لذلك اوه ان هاي حذفت المنشور بعد ساعة ومو بس المنشور الي انحذف كل حسابات المحامي الي كانت عمالتله تاغ انحذفت وتقريباً اختفى هاد الشخص من الانترنت
بسبب هاد الكلام في بعض الاشخاص طالعوا نظرية انو هاد الشخص اله علاقة في موتها لانهم حاولو يربطوا الكلام الي كتبته وطلعوا باستنتاج انو ممكن اوه ان هاي كانت رح تفضح شي هو مخبيه ولحتى ما ينفضح قتلها، بس طبعاً انا ما عم اتهم الشخص ومامنقدر نتهم حدا اصلا لانو انا بس عم احكي النظريات الي طلعت عن الموضوع
نظرية تانية كمان تم بنائها على كلام قالته صديقتها والي هو ان اوه ان هاي كانت تعاني من اكتئاب شديد اجاها من سنة ٢٠١١ لانها في حفلة من الحفلات لبست لبس فاضح فهاد الشي ادى الى موجة غضب وكره من الناس وحتى ان هاد الموضوع اثر على عملها وصارت الشركات ترفض تشتغل معها بسبب انو الناس صارت تكرهها من بعد ما لبست اللبس الي ما عجب الناس، فقد تكون الفيديو االمنشور الي نشرته هو عبارة عن تلميح انها رح تنتحر ومع الاسف نفذت الشي الي كانت عم تلمحله
