تخيل انو في يوم من الأيام تنام وتصحى تلاقي حالك محبوس في بيت مافي حدا غير أنت واشباحك المرعبة، شلون رح تتصرف؟؟
بعرف انو ولا واحد فيكن صار معه هاد الشي لذلك رح نتعرف على قصة قناة هاي انا ماري.
hiimmarymary قناة تم انشائها على اليوتيوب في سنة ٢٠١٦ وأول فيديو بالقناة هو فيديو تعريفي بعنوان hello، في هاد الفيديو ماري حكتلنا انها في يوم من الايام صحيت من. النوم، وهي فاقدة الذاكرة، بشكل شبه كامل، مو متذكرة من هي او وين هي بس قالت ان البيت الي هي فيه هو نسخة من بيت اهلها، ( اعتقد هي النقطة مهمة لحتى نفهم معنى القصة ولازم نرجعلها بعد شوي) والبيت الي هي فيه ابوابه وشبابيكه مقفولة وما بتقدر تطلع من البيت، وهي موجودة لحالها بالبيت، أو على الأقل بالنهار بس هي لحالها…{فيديو}
بالبيت كان في كاميرا وانترنت لذلك هي قررت تصور قصتها هيك، بس حتى على الانترنت هي لحالها بالفيديو نفسه عرضت حسابها على التويتر وكان فاضي مافي اي حدا يتفاعل معها وعلى اليوتيوب التعليقات مغلقة على الفيديوهات، يعني مافي غير ماري والفيديوهات الي عم تنشرها، حسابها على التويتر وقناتها على اليوتيوب عم يكبروا وتجمع ارقام وفي ناس عم تتابعها بس هي ما كانت تشوف هاد الشي كان دائما كل شيء تشوفه هو صفر!
ماري حكتلنا كل هالاشياء بدون ما تحكي ولا حرف مجرد كتابة كانت تظهر فوق الفيديو بالكتابة هي نفسها هي قالت انها خجولة، فاعتقد ان هاد هو السبب الي خلاها ما تحكي… الصمت الي بالقصة او الي بالفيديوهات كان رهيب جداً أنا كتير عجبني ( يمكن لانو القصة بتشبهني او تعبر عني )
بعد ما فاقت ماري وشافت حالها بهاد البيت بدءت تحاول تبحث عن أشياء تخليها تعرف مين هي ماري تبحث عن نفسهاوحتى انها حاولت ترسل طلب استغاثة من خلال شيفرة مورسي الي حاولت انها تعملها على باب البيت على أمل ان حدا يكون جنب البيت ويسمعها، بس طبعا ما في حدا لانو هي اصلا بالبداية قالتلنا انو هاد على ما يبدو هو نسخة من بيت اهلها يعني هاد العالم الي هي فيه مو حقيقي، وتقريباً هي عارفة انو مو حقيقي بس ما عم تقدر تطلع منه، وهاد الشيء رح يصير أوضح ورح تفهمو كلامي لما نوصل لنهاية القصة.
بعد ما انها فشلت بطلب المساعدة بدءت الوحوش الي عايشين معها يظهرو واول وحش ظهر هو وحش الجمال: رح اشرح اكتر، هاد الوحش كانت ماري تشوفه دائماً لما توقف قدام المراي، والوحش هاد كان لابس قناع، وعم يعمل حركات كانها حركات عرض جسم انو شوفي انا احلى منك وتضحك عليها بنفس الوقت،{ فيديو}، لحد ما وصلت ماري لمرحلة قالت هي أحلى مني، وانا رح أكسر لمراي… ليش رح تكسر لمراي لحتى تحاول تهرب من هاد الوحش او من هاد الشي الي عم يهاجمها، يمكن تكون ماري تعرضت لهاد الشي من قبل فلذلك صارت تكره حالها وتكره شكلها وصار هاد الخوف يجيها
اجى تاني يوم وبدئت ماري يومها عادي كانت تحاول ترسم او تلعب او تعمل اي شي لحتى تمضي وقتها، ولما صار وقت النوم اجاها الوحش التاني {فيديو} هاد الوحش بيظهر في اكتر من فيديو وفي اكتر من مكان بالبيت ولكن المكان الي كان يظهر فيه اكتر شي هو المكان الي تحاول ماري تنام فيه، كل ما تحاول تنام يجي لفوق راسها ويمنعها تنام، يعني صار عنا حالياً ماري، ومشكلتها مع شكلها ومشكلتها مع الشي الي بيضل فوق راسها وما بخليها تنام… والحلو انو لسا في اشياء تانية، في فيديو عنوانه Discovery في وحش تالت بيهجم على ماري ولما ماري بتحاول تهرب منها وتروح تتخبى بغرفتها بتلاقي حالها فجأة غرقانة في بحر.{فيديو} وبعد ما تطلع من البحر بتلاقي حالها بغابة كبيرة بتضل تمشي فيها لحد ما فجأة تصحى وتلاقي حالها في المكان الي كانت عم تهرب منه من الوحش الي لحقها، لذلك قررت ماري تصير قوية وتواجه الاكتئاب او تواجه الطاقة الشريرة والوحوش هدول، وهاد الي صار{فيديو}بما انو اخر شي كانت ماري نايمة على الارض على الاغلب انو هاد الشي الي شفناه كان مجرد احداث صارت في راسها او هي مجرد حلم، بس الي مو حلم والي المفروض انه صار حقيقة هو هاد{فيديو}
