احذر قنوات اليوتيوب هذه! (الفيتيوبرز)

الفيتيوبرز

عمرك سمعت بمصطلح Virtual YouTuber أو الفيتيوبرز ؟ انا رح اعتبر ان جوابك هو لا واشرحلك ال Virtual YouTuber.

من هم الفيوتيوبرز؟

ال Virtual YouTuber او المعروف كمان باسم Vtuber هو مصطلح يطلق على شخصيات يوتيوبية غير حقيقية و٩٠ بالمية منهم بيكونو متحدثين باللغة اليابانية…. بعرف ما فهمت لانو لسا ما شرحت شي اصبر شوي

في قنوات يوتيوب كاملة قائمة على شخصيات وهمية متل شخصيات الانمي مثلا… بيجي شخص بيعمل مجسم 3D لشخصية معينة هو بيعملها وبيطلق القناة بناء على الشخصية الي عملها، وهي الشخصيات في منهن البنات المزز الحلوين، وفي منهن الاشباح الي شوفتهن بتقطع الرزق… وانا حالياً رح اركز على الاشباح

طبعاً في ملاحظة بسيطة لازم تعرفها انو هاد الشي مختلف تمامً عن الناس الي بترسم وبتعمل انيميشن، يعني نوع الفيديوهات الي بيعمله حسين عبدالله وسروز، مختلف تمام عن نوع الفيديوهات الي رح نشوفه هلأ.

ولي هي وحدة من القنوات الي رح تجبلك القشعريرة ممكن بسبب المحتوى الي فيها…

أغلب فيديوهات القناة هي عبارة عن دمية شكلها مرعب وعم تحكي كلام غير منطقي ابداً وبطريقة مخيفة..

كل الكلام الي مكتوب بالقناة من عناوين وغيره لما تحطه بترجمة قوقل بيتعرف عليها على انها لغة يابانية، ولكن بحسب ما شفت اثناء بحثي عن موضوع القناة أغلب الناس الي بتحكي ياباني مالن قادرين يفهمو الكلام هاد لانو مستخدم احرف الكانجي والي اصعب جزء من اللغة اليابانية..

شاهد أيضاً: ما هي الماسونية الحقيقية؟

هلأ انا ما بفهم ياباني بس بحسب كلام الناس الي شفته وبحسب الترجمة الي قريتها من بالفيديوهات، نوغومو كان دائماً عم يكرر كلامت غريبة متل، انا رح اشرب دمك، انا اقف خلفك، انا عالق في كمبيوترك، وكلامات مخيفة مشابهة لهالكلام، اضافة الى ذلك انك لم تشغل الترجمة للغة اليابانية رح يطلعلك كلام مختلف تمامً عن الكلام الي رح يطلع بالانكليزي او بأي لغة تانية…

وماحدا كان قادر يقرأ الكلام المكتوب او حتى يعرف معناها حتى الاشخاص المتحديثن باللغة اليابنية، وحتى لما حاولت اترجم اسم القناة على قوقل صار شيء ما كنت متوقعه ابداً، لما اختار يترجملي ياها للعربي ما بيترجمها وبيكتب مكانها حرف واحد بالياباني واذا حولتها للانكليزي رح يطلع نفس الحرف بس لما رجعت حولتها من الانكليزي للعربي مرة تانية الحرف تغير مع انو الكلمة نفسها ما غيرت فيها شي .

بالنسبة الي بعد ماقدرت افهم من القناة ولا شي ولا افسر منها ولا شي، مو بس انا كتير ناس على الانترنت ما فهمت الموضوع ما عدا فئة قليلة جداً وهنن اشخاص يابانيين قدرو يفسرو جزء بسيط يمكن يفسرلنا القناة كلها.

باول فيديو بالقناة كان في شيء يشبه وجه طفل محطوط على قرص عم يدور، وفي صوت بكاء طفل، وشكل نوغومو او شكل الدمية الي عم تطلع بالفيديوهات بتحس وجها بيشبه وجه الطفل، وفي فيديو موجود بالقناة بكون فيه اصوات مرعبة مخيفة جداً مع صوت بكاء طفل وهاد المقطع نفسه لو شغلته بالعكس رح تسمع جملة momy i want to be born too يعني انا ايضا اريد ان انولد يا امي.

بناء على هي المعلومات فسروا انو ممكن صاحب القناة كان بده ينجب طفل او كان عنده طفل وفقده بطريقة ما وهل القناة لحتى يعبر فيها عن حاله او انه بدو ينتقم من الشي الي منعه من انجاب طفل او الي خللاه يفقد الطفل لذلك كان دائماً يقول انا خلفك انا سأقتلك ومن هذا الكلام.