قضية باتريشا وحبيبها
في 2/1/1956 Great Falls, Montana الصديقين او الحبيبين باتريشا الي عمرها 16 سنة و لويد الي كان عمره 18 سنة، طلعوا مشوار مع بعض في صباح هاد اليوم، وللأسف صار الليل وصار الوقت الي المفروض كل شخص منهن يرجع على بيته بس ما حدا رجع لا باتريشا ولا لويد!
مع انو القضية صارت بالخمسينات الا انها انحلت في سنة 2021 يعني بعض 65 سنة تقريباً، لذلك ابقى معي للاخر لحتى تعرف التفاصيل كاملة
في وقتها باتريشا كانت طالب في المدرسة وتعرفت على لويد قبل شهر من الحادثة هي في عرس وشخص من اقرابئها، ومن وقتها صاروا مغرمين ببعض، الجماعة حبوا بعض حب من أول نظرة، اخر مرة الناس شافوهن عايشين كانت في نفس اليوم الي اختفوا فيه الساعة 9 المسا وقتها كانوا طالعين من مطعم في منطقة غريت فالز وبعد ما طلعوا من المطعم اتجهوا على منطقة اسمها ممر العاشقين موجود كان قريب من حديقة اسمها وادروزث ومن وقتها مارجعوا
في هاد الوقت اهلها كانوا مفكرين انها هربت هيك هربة صغيرة ورح ترجع، لانو اختها الي اكبر منها لما كانت في نفس عمرها كمان هربت ورجعت فكانوا مفكرين انها عم تقلد اختها وانو رح ترجع لحالها وكانو بيعرفوا انها مع لويد
اما لويد فكان وقتها طيار عسكري يعني بيسوق طيارات عسكرية، وكان معروف انه مطيع لبتريشا كتير يعني اذا قالتله خلينا نرجع عالبيت رح يرجع، وهاد الشي الي خلا الاهل يخافوا، لانو باتريشا كان عندها دوام بالمدرسة تانية يوم وهي بتحب الدراسة كتير وعندها طموحات كتير بانها تتخرج من الثانوية وتدخل جامعة والخخخ… لذلك لما اجا تاني يوم وباتريشا ما راحت عالمدرسة وقتها عرفوا الاهل انو في شي موطبيعي بالقصة
في نفس الليلة كان في ممجموعة اشخاص ما شيين بالمنطقة وشافوا شخص مستلقي على الارض جنب الشجرة وتحت سيارته، ولما قربوا عليه لحتى يشوفوه اكتشفوا انو مييت
تاني يوم يعني في تاريخ 3/1 كان في 3 اولاد عم يتمشوا في منطقة غريت فالز وشافوا بالصدفة بقايا جسم لويد، كان جسمه نصه تحت السيارة ونصه التاني برا، وكانت ايديه مربوطة بحزامه لورا ضهره ومضروب رصاصة في جمجمته ولما اخدوا جثته للاطباء فعلاً تاكدوا انو مات بسبب طلق ناري وكمان قالوا انو على الاغلب لويد بقي عايش لبعد كم ساعة من الضربة ومامات فوراً وللاسف الشرطة حاولت كتير انها تدور على الطلقة الي انضرب فيها لحتى يقدروا يحددوا السلاح الي طلعت منه وكذا ولكن ما كان في أي اثر
وبعد يومين في تاريخ5/1 تم العثور على بقايا جثة باتريشا في وادي صخري بيبعد حوالي 12 كيلو متر عن المكان الي كانت موجودة فيه جثة لويد
باتريشا كانت موجودة على جسر ارتفاعه 20 قدم عن طريق عام، هلا الشرطة بتعرف انو التنين كانوا مع بعض، ومافي ولا احتمال انهن يكونو افترقوا لحالن وكل واحد راح على المنطقة ومات، واضح انو الشخص الي قتلن هو الشخص الي حط جثثهن في اماكن متفرقة
لذلك الشرطة عم تحاول تبحث عن دافع للجريمة هي اول شي خطر على بالهن هو السرقة بس استبعدوا هي الفكرة لانو في سيارة لويد كان فيه كاميرا، والكاميرا بهداك الوقت غالية كتير ونادرة لو كان الغرض السرقة كان الحرامي سرق الكاميرا، او حتى مصاري لانو كمان كان في مصاري في محفظة لويد لو كان المجرم حرامي وعمل جريمته منشان يسرق كان اخد الاغراض
شكو انو يكون السبب هو التحرش ب بتريشا بس ماكان في دليل على هالشي ولما شافوها كان لسبها كامل موجود وماكان في اشارات على جسمها بتوحي بهالشي بس لما اخدوها عند الاطباء وصار في فحوصات وتصوير وكذا، وقتها الاطباء قالوا انو لا باتريشا تعرضت لاعتداء ووقتها اخدو عينات دي ان اي منها واحتفظوا فيها، التكنولجيا المستخدمة حالياً بحاليل الدي ان اي ما كانت موجودة وقتها فكان من سابع المستحيلات انهن يعرفوا مين صاحب الدي ان اي، بس احتفظوا بالعينة كجزء من روتين الشغل لازم ياخدو كل شي ويسجلوا والامور هي وكمان كان في بعض الكدمات بجسمها وكأنو كان فيه عراك بينها وبين القاتل
وفي نفس اليوم الشرطة وصلت لشخص مشتبه فيه ممكن يكون اله علاقة بالجريمة، هاد الشخص كمان طيار كان بيتشغل مع لويد، وما تم الافصاح عن معلومات الشخص هاد، والشك بالشخص هاد اجا بناء على قصة حكتها أم باتريشا، أم باتريشا قالت للشرطة انو قبل كم يوم من الحادثة لويد كان مزعوج كتير ومدايق، ولما سألته ام بتريشا عن السبب، قاللها انو في مشكلة بينه وبين شخص بيشتغل معه، لذلك شكوا فيه انو ممكن يكون حقد عليه بعد المشكلة هي ولكن تبين انو ما دخله
والقضية صارت كولد وما حدا قادر يحلها، ومضي الوقت ووصلنا لسنة 1989المحققين قرروا انهن يبحثوا عن الرصاصة الي انقتل فيها لويد بقلب الشجرة، لانو متل ما قلتلكن بالبداية بالوقت الي كانوا عم يحققوا فيه بالجريمة ما شافوا الرصاصة، ووجود الرصاصة عندهن رح يساعدهن كتير بحل القضية واحتمال كتير كبير يوصلوا للقاتل من خلال الرصاصة بس
شاهد ايضاً: جريمة هزت ايس لاند ( اامن دولة في العالم)
والشجرة كانت كبيرة كتير طولها 80 قدم وقطرها 3 قدم، حاولوا من قبل يعملو صورة اكس راي للشجرة بس فشلوا وهلا بعد 33 سنة قررا يرجعوا يبحثوا بالشجرة شافوا الفتحة الي دخلت منها الرصاصة عالشجرة بس ما استفادوا شي وما قدروا يعرفوا لمين تابعة الرصاصة
والشرطة مستمرين بالتحقيق بدون توقف، وحققوا مع أكتر من 35 شخص ممكن يكون مشتبه فيهن بالقصة وواحد من هالاشخاص كان اسمه ادوارد واين، ادوارد هاد كان مسجون بتهمة السطو المسلح وهرب من السجن سنة 1955 وبعدين رجع هرب وصار يسرق محلات وكازيات وحتى انهم في سنة 1961 حطوا في قائمة الموست وانتد وقدروا يمكسوه في سنة 1962 وتم اطلاق صراحه بعد 6 سنين ورجع انمسك في سنة 2009 بتهمة قتل 4 اشخاص كلهن كانت اعمارهن بين 18و20 وقتها انحكم مؤبد ومات بالسجن بعد سنة تقربياً لانو صار عمرو مليون سنة كان كبير كتير بالعمر يعني ومات موتة طبيعية
السبب الي خلا الشرطة تشك فيه انو هاد الشخص كان يستهدف المرتبطين وتحديداً في منطقة جسر العشاق ال راحو عليها اخر مرة باتريشا ولويد وكمان كان فيه مشتبه فيه تاني اسمه جيمس، وجيمس كان مجرم خطير معروف بالاعتادئات والقتل بس مع ذلك ما في دليل ضد اي شخص
وماحدا قدر يحل القضية والموضوع شبه انتسى لحد سنة 2021 وقتها في محقق جديد اسمه جون كادنر استلم القضية، ولما استملها من الشرطة شرحولوا عنها واعطوه كل تفاصيل القصة وحكوله انو في سنة 2001 انعمل تحليل دي ان اي لعينة اخدوها من جسم باتريشا بس لما فحصوها ما طلعت تابعة لبتريشا ولا حتى ل لويد وما كان في اي شخص مسجل السجلات بنفس الدي ان اي
يعني بتقدر تقول انو احتمال كتير كبير يطلع الدي ان اي هاد هو دي ان اي القاتل بس للاسف ما قادرين يعرفوا مين صاحبه
في سنة 2019 حاول هاد المحقق انو يعمل اعادة بناء للعينة باستخدم تقنية اسمها bode لانو العينة تلفت بسبب انو صارلها اكتر من 50 سنة، وطبعاً حاول يقارنها بسجلات ال دي ان اي الي موجودة عندهن وما شاف اي شي لذلك قرر يعمل شي مختلف
اذا بتتزكروا هيك قبل كم سنة يعني 2018 او 19 بالفترة هي طلع هبة فحوصات ال دي ان اي حتى انو تلت رباع اليوتيوبرز يعملوا عنها فيديوهات انو في شركات خاصة بتاخد الدي ان اي تبعك وبتجلبك شجرة عيلتك الكاملة او بتجبلك الاشخاص الي عندهن نفس الدي ان اي
وفعلاً وقتها حط الدي ان اي بالمنصات هي وطلع في 3 اشخاص موجودين بالمنصات هي بنفس الدي ان اي، وقتها تواصلوا مع الاشخاص هدول وعائلاتهن وعملوا تحاليل والخخ ومن خلال الموضوع هاد قدروا يوصلوا لشخص اسمه كينث جولد
يعني الدي ان اي الي كان موجود على جسم باتريشا هو دي ان اي تبع كينث جولد وقتها المحقق كان سيعد جداً وفرح وحتى انه طلع بمقابلات صار يقول واخيراً وبعد 65 سنة صار في عنا دليل ممكن نعتمده بالتحقيق لانو كل شي قبل هاد كان مجرد نظريات وهلا بلشنا بالجد
من الطبيعي هلا انو الشرطة تروح لهاد الشخص ويعملوله تحاليل لحتى يتاكدوا انو هو الشخص هاد فعلاً ومافي غلط، وللأسف اكتشوفا انو كينث مات في سنة 2007 وجثته انحرقت الحل الوحيد حالياً انو يوصلوا لولادو لانو اولاده رح يكون الدي ان اي تبعن رح يكون مطابق اكيد فأذا كان الدي ان اي تبع اولاد كينث هو نفس ال دي ان اي الي عندن رح يتاكدوا انو هو الفاعل
وبحسب كلام المحققين انهن كانوا خايفين من الموضوع هاد كانو خايفين يروحو لعند اولاده ويقولولن انو ابوكن الميت ممكن يكون مجرم وبدنا تحاليل وكذا كانوا خايفين انو تكون ردة فعلهن سيئة بس لحسن الحظ كانوا متعاونين واعطوهن عينات دي ان اي وحللوها
والنتيجة طلعت مطابقة مية بالميةيعني المجرم هو كينث جولد، ليش قتلهن وشلون قتلنه للأسف مارح نعرف طول عمرنا لانو مات ولكن كان الامر جيد ومفرح بالنسبة للشرطة انهن قدروا يحلوا القضية وحتى انهن اتصلوا باهلي باتريشا ولويد وخبروهن بالقصة كلها وقالولن صح انتظرتو 65 سنة بس بالاخير عرفتوا الحقيقة
وكمان بنت كينث علقت على الموضوع بجملة بسيطة، وقالت ماحدا ممكن يعرف الحقيقة لانو كل شخص فينا عنده سر ما حدا بيعرفه نهائياً وممكن يكون هاد هو سر والدي الي ما حدا بيعرفه
ولحتى يتاكدوا الشرطة كمان من انو فعلاً كينث هو الفاعل بحثوا بتاريخه وعرفوا انو كان ساكن في منطقة قريبة على بيت باتريشا وكان موجود وقتها، وهاد دليل بيدعم القضية، اتوقع القضية مو محجتاجة دليل تاني لانو الدي ان اي كافي بس انو حبوا يتاكدوا من وجودوا بالمنطقة وقت الحادثة وتبين انو قعلاً كان ساكن بالمنطقة وقتها
