أكثر قصة مجنونة رح تسمعها في حياتك!

مليونير وصاحب واحدة من أكبر الشركات التقنية، الي احتمال كبير جداً تكون أنت شخص استخدم منتجه في مرحلة ما من عمرك.

ترشح إلى رئاسة الولايات المتحدة الأمريكية، وتحول إلى قاتل

نعم قاتل وهو مطلوب دولياً! ,

لذلك تابع معي للنهاية لأن هي القصة رح تكون أكت قصة مجنونة بتسمعها في حياتك!

قصة مجنونة

ولد جون ماكفي سنة 1945 في أنجلترا، ونشأ في بيئة منزلية غير مستقرة أبداً، لأن والده كان مدمن على شرب الكحول، وكان يعنف زوجته وأولاده بشكل متكرر وقاسي

والأسوأ من هاد كله أنو لما صار عمر جون 15 سنة والده أنتحر!

مع أنو جون عاش ظروف قاسية من بداية طفولته، إلى أنه كان شاب طموح جداً وكمل دراسته وتخصص في الرياضيات في الجامعة

وفي رحلته الجامعية جون كمان وقع في مشكلة أدمان الكحول والمخدرات.

وهذا الأدمان استنزفه مادياً، وهو أصلاً يعني بكل الأحوال حالته المادية كانت يادوب وممشي أموره

فلما وقع بالأدمان صرف كل شيء بيمتلكه على أدمانه، وصار محتاج الى مصدر دخل يسد رغباته ومتطلبته

فبدأ أنه يبيع مجلات في الجامعة، وهي التجربة كانت جيدة بالنسبة أله وطورت شخصيته ومهاراته في البيع

لما لاحظ أنه هو شاطر في البيع قال لحاله خليني أستخدم مهاراتي هي وأبيع شي تاني يطلعلي مصاري أكتر من المجلات

وبعد تفكير دام لفترة قصيرة جداً قرر أنه يبيع كوكاين!

وفي نفس الوقت الي كان يدرس فيه رياضيات ويبيع مخدرات، جون كان عم يتعلم البرمجة

وبعد ما تخرج راح اشتغل كمبرمج في وكالة ناسا الفضائية واشتغل على واحد من أكبر مشاريعهم والي هو مشروع Apollo

وصدقني أذا كنت مفكر أنو الأحداث هي مجنونة وغريبة، بحب أقول لك انه كل ما نتعمق بقصته أكتر كل ما نسبة الجنون رح تزيد أكتر!

المهم، بعد ما جون اشتغل فترة مع ناسا، انتقل إلى “السيليكون فالي” هي المنطقة مشهورة جداً في أمريكا بأنو كل المشاريع التقنية بتطلع منها وكل الشركات الناشئة والكبيرة بتكون فيها

يعني هي المنطقة فيها بيئة حاضنة

وبالفعل لأنه كان شاطر كتير في البرمجة حصل على وظائف بسهولة و أصلاً في زمنه ما كان في أشخاص كتير بيفهموا بالبرمجة، لانو البرمجة نفسها كانت لسا جديدة عالسوق.

الفرصة الي كانت عنده كان صعب كتير أنو أي شخص تاني يحصلها، ولكن جون ما كان كتير مقدر النعمة الي عنده

شاهد أيضاً المزيد من القصص هنا

وتابع فيديو القصة على قناة سكطعش

وصار يقول أنو الشغل ممل كتير، لحتى يسلي ممله كان قبل ما يروح على دوامه يشرب قنينة كحول كاملة

وبالشغل نفسه في نص الدوام كان يحط الكوكاين عالطاولة ويتعاطه

صحاب الشغل كشفوه وطردوه من الشغل فوراً

بس طبعاً جوني ما كان مهتم أبداً لانو عارف أنو في كتير شركات محتاجه خبراته ورح يرجع يلاقي وظيفة تانية بسهولة

ولما لاقها رجع يعمل نفس الشي، يعني رجع يتعاطى مخدرات اثناء دوامه وهالمرة صار يتعاطى بكميات كبيرة لدرجة أنو جسمه صار ينمل ويفقد الأحساس بالأشياء الي عم تصير حواليه!

في حدث واحد صار وكان جون ماكفي واعي عليه وهو أول فيروس بيصيب كمبيوتر في العالم.

هذا الفيروس ظهر سنة 1986 وسموه بأسم “Brain” أو العقل

وهذا الفيروس أصاب كمبيوتر من كمبيوترات شركة IBM

راح لعندهم جوني واستخدم مهاراته في البرمجة، وقدر يكتب كود برمجي يبطل عمل الفيروس الي اصاب الكمبيوتر

وشخص مثل جون ماكفي أكيد رح يتشغل الشي الي خترعه ويستفيد منه

لذلك ماكفي الخد الكود الي كتبه لكمبيوتر شركة IBMوحوله إلى سوفتير أو برنامج كامل، برنامج مكافحة الفيروسات وسماه ماكفي انتي فايروس… وهاد هو شعاره، اذا انت شخص يستخدم الكمبيوتر أكيد شفت هاد البرنامج أو استعملته ولو حتى مرة وحدة في حياتك

جون كان شايف أنه هذا الموضوع مهم جداً للناس وهاد الشي يعني مبيعات والكلام هاد صار سنة 1987

المشكلة هون أنو وقتها ما كانت حدا بيعرف أيش يعني مضاد فيروسات أصلاً مافي حدا بيعرف أيش يعني فيروس للكمبيوتر اصلاً

وبما أنه البرنامج طلع بعد ما تضرر كمبيوتر من كمبيوترات شركة IBM كل زبائنه كانوا الشركات الي بتخاف على بيانات أجهزته أو الي عندها معلومات حساسة ومابدها تخسرها

بس ماكفي كان شوية طماع، وحابب أنو يبيع نسخ أكتر من برنامجه لحتى يطلع مصاري أكتر

لذلك رسم خطة تسويق حقيرة شوي، لانه صار يتفق مع محطات الأخبار لحتى يعملوا معه مقابلات يحكي فيها عن أضرار الفايروسات وكيف أنها ممكن تسرب ملفاتهم أو تدمرها وأنو الحل الوحيد لهي المشكلة هو أنك تشتري برنامجه

يعني كان يتبع أسلوب التخويف، لحتى يقنعهم يشتروا برنامجه الي بعالج مشكلة هم أصلاً مو عارفين أنها موجودة!

وبحلول سنة 1992 وصل عدد الشركات الي تستخدم برنامج ماكفي للفيروسات، إلى 100 شركة

وطبعاً ممكن تفكر أن العدد قليل ولكن، ال100 شركة هدول عندن مئات الكمبيوترات فاالعدد مو قليل أبداً

ما عدا الأفراد الي كانوا يشتروه ف يعني اموره كانت ظاطبة مية مية وأسلوبه بأقناع الناس نجح وحصل ملايين الدولارات من بيع هاد البرنامج

وهالملايين تضاعفت بشكل كبير ، لما أنتشر فيروس جديد اسمه “مايكل أنجلو”

هاد الفيروس كان خبيث جداً وحتى أنهم صاروا يتكلموا عنه بالتلفزيون.

خباثة هاد الفيروس هو انك مارح تحس أنه موجود ب كمبيوترك أصلاً، لان الفيروس مارح يعمل أي شي ألا في يوم 6 مارس، والي هو يوم عيد ميلاد مايكل انجلو

في هاد اليوم بيقرر الفيروس أنه يتنشط، ويحذف او يشفر كل ملفاتك.

الناس كانت خايفة منه كتير لانه بالفعل مافي أي طريقة تقدر تعرف اذا جهازك مصاب فيه أو لا، إلا في يوم 6 مارس لما يحذف كل ملفاتك

ف جون استغل خوف الناس من هاد الفيروس ورجع يظهر بالإعلام ويخوف الناس أكتر من الفيروس ويقول لهم أن الحل الوحيد لحتى تحموا نفسكم من الفيروس أنو تشتروا برنامجي

بالفعل عدد مبيعاته تضافع بشكل مهول، ولكن بعد يوم 6 مارس بدأت الناس انهم تتهمه بالنصب والاحتيال

لانه ماكفي قال للناس أنه في 5 مليون كمبيوتر مصاب بهالفيروس، ويمكن كمبيوترتك يكون واحد منهم

بس بعد ما أجا يوم 6 مارس تبين أن الفيروس موجود بالفعل، ولكن عدد الأجهزة المصابة لا يتجاوز ال20 ألف جهاز، وهاد الرقم كتييييير بعيد عن ال5 مليون ألي قالها جون

الدنيا كانت مقلوبة على راسه، وكل العالم صارت تكرهه حتى موظفينه، الي كان عددهم 20 بس

تخيل انو شركة صار عندها ملايين المستخدمين وملايين الدولارات 20 شخص بس مسؤلين عنهم كلهم

موظفينه كانوا يكرهوه لانه كان يخليهم مدوامين في المكتب 24 ساعة، وكان يخليهم يعملوا أشياء غير أخلاقية.

ورح اخلي وحدة من موظفينه تعطيكم مثال عن هالأشياء!

أكيد خطر على بالك تقول انه طالما هو شخص سيء ليش كانوا باقيين يشتغلوا معه؟

بكل بساطة الحاجة، جون كان يستغل حاجتهم الى الشغل وعارف أنهم مارح يقدروا يتركوه

وكمان كون ان الشركة تفجرت مبيعاتها بهالشكل كل الموظفين زاد دخلهم وكانوا يكسبوا مبالغ مرتبة

لذلك كانوا يتحملوا تصرفاته الغبية والغريبة لحتى ياخدوا الفلوس.

بعد كللل هالجنون الي صار في حياته من لما ولد إلى هذه الحظة، جون قرر يرفع مستوى الجنون أكتر

وصدقني كل ما نتعمق أكثر في قصته رح يرتفع مستوى الجنون

المهم بعد شهرة شركة ماكفي جون قرر أنه ينزل شركته في سوق البورصة أو الاسهم لحتى يجي مستثميرين ويستثمروا فيها

وبالفعل هاد الشي صار وفي كتير رجال أعمال ضخوا مبالغ كبيرة في الشركة، بس لما شافوا أسلوب جون بالشغل وكيف بيتعامل مع موظفيه ماكانوا راضيين عنه، وطلبوا أنهم يخلوا الشغل” أكثر احترافية” على قولتهم

بس طبعاً جون رفض هالشي وقالهم اذا بدكم تغيروا اسلوب الشركة أنا رح اطلع منه

قالوله مافي أي مشكلة الله معك اطلع منه، ودفعوله مبلغ 100 مليون دولار مقابل أنه يبيع حصته من الشركة

وهيك بتكون علاقة جون ب شركة الأنتي فيروس انتهت إلى الأبد، وبدأت مرحلة جديدة في حياته

اسمه مرحلة الجنون والأجرام!

بحلول سنة ال2000 ثروة جون كانت تتجاوز ال100 مليون دولار، وما كان عنده أي مسؤوليات أبداً، لا شغل ولا غيره

شخص غني في بجيبه 100 مليون، وعايش حياته بالهبل

بس هاد الشي ما كان لصالحه أبداً، وولد بداخله حس من الخوف المستمر، لانه شخص مشهور وغني، وممكن يتعرض للسرقة او ااغتيال وكتير اشياء تانية

ف صار ما يمشي بالشارع الا ومعه سلاح، ورجع يتعاطى مخدرات بكميات كبيرة جداً

ولحتى يتخلص من شعور الخوف هاد قرر جون أنه يرجع يعمل شي مفيد في حياته، وراح اشترى أرض كبيرة مساحته 300 فدان

وبنى فيها نادي لليوجا، وصار يزعم الناس انهم يجوا يتمرونا ويعيشوا في هاد المكان ببلاش وكل شي على حسابه، وحتى أنه صار يكتب كتب عن اليوجا كمان

بعد ما عمل كل هالأشياء اكتشف أنه لسا عنده مساحة أرض كبيرة كتير لازم يستغلها، وبما أنه شخص بيحب الأشياء الخطرة، قرر يعمل شي اسمه ” أيروكرافتينغ”

الأيروا كرافتنيغ بكل بساطة عبارة عن طيارة تطير على ارتفاع منخفض جداً من الأرض يعني تقريباً بيطير بين المباني

كان معجب بالموضوع كتير، وراح عمل موقع على الأنترنت وصار يسوق له لحتى يجيب زباين تجي تعيش هالتجربة معه ويطيروا بالارض والمساحة الي عنده

وقتها كمان علم أبن اخوه الي كان عمره 22 سنة وقتها كيف يسوق الطيارة لحتى هو يصير يسوق الطيارة بالزباين

للأسف في سنة 2006 في حادثة مأساوية صارت رجعت قلبت الدينا على راس جون

والي هي أنو في أحدى الرحلات الي كان بيقودده أبن اخوه عملوا حادث وضربوا بجبل موجود في ولاية أريزونا

وأبن اخوه لجون و روبرت الي هو الزبون الي كان ركاب معه ماتوا.

وبما أنو جون هو صاحب شركة الطياران هي، أهل روبرت رفعوا عليه قضية وطالبوا بتعويض 5 مليون دولار لانه شركته تسببت في ممقتل أبنهم

إذا كنت مركز معي بالقصة منيح وعارف ثروة جون اكيد رح تكون عارف أنو مبلغ 5 مليون هو مبلغ بسيط جداً بالنسبة له، وممكن بكل بساطة انه يدفعه ويسكر عالموضوع

بس شخص جشع مثل جون أكيد مارح يعمل هيك شي، بل بالعكس، جون هرب من أمريكا وراح على بلد أسمها ” بليز”لحتى يهرب من الدعاوي والقضايا الي كانت تنرفع عليه

لانو مو بس أهل روبرت الي رفعوا عليه دعوا، كان في كتير ناس غيرهم عم يرفعوا عليه دعاوي لأسباب مختلفة ويطالبوه بتعويضات مادية

ف بوجهة نظر جون أنه هو شخص مستهدف والناس طامع بفلوسه لهيك عم يحاولوا يوقعه بالقانون

لذلك جوني عمل حركة خبيثة جداً، وهي أنه صار يقول للناس أنه أفلس!

نعم أفلس وحتى انه باع كل ممتلكاته وترك أمريكا

طبعاً هاد الشي غير صحيح بس هو كان عم ينشر الاشاعة هي لحتى ما يدفع المبالغ الي عليه ويقنع الناس أنه أفلس

بليز كانت جنة بالنسبة لانه، لانه بلد بالفعل طبيعته جميلة جداً، وفي كل شي ممكن يحتاجه، خصوصاً أنه هو مليونير والمصاري الي معه بتكفيه يضل عايش لاخر حياته بدون ما يشتغل أي شي

أول شي عمله لما وصل عالبلد أشترا أسلحة وأجهزة كمبيوترات واعطاهم للشرطة، ليش؟؟

لحتى يخليهم يوثقوا فيه ويساعدوه بكل الأشياء الي بدو يعملها

وكالعادة جون، بدأ يتعاطى المخدرات ويواعد بنات بالجملة وحياته كلها كانت ضايعة هيك

واحدة من البنات الي تعرف عليهن جون كانت عالمة أحياء اسمها ” اليسون”

اليسون كانت جاي زيارة على بليز لانها سمعت أنو في عندهم نبتة ممكن يستخصلوا منها مادة بينعمل منها مضاد حيوي نباتي

يعني منقدر نقول أنها زيارة عمل او استكشاف

طبعاً جون شافها وعجبته الفكرة، وقال أنو هي الفكرة بيطلع منها بزنز مرتب

فمباشرة استخدم قوى ثروته وبنى مختبر وجاب اطباء يساعدوها ووفرلها كل شي بتحتاجه لحتى تنجز مشروعها

وبالمقابل لما توصل للنتيجة او للعلاج اكيد رح يكون اله حصة من المبيعات

وقبل ما تلحق اليسون توصل إلى أي استنتاج، جون بدأ يدعي الصحافة لحتى يجوا على المختبر ويحكي عن العلاج الثوري الي رح يعملوه

المشكلة هون انو أليسون لسا ما عملت أي شي، وقالته أنو أنا ماعندي شي أحكيه للصحافة ليش جبتهن؟

رد عليه جون وطلب منها انها تجيب مي وتصبغا بملونات الطعام وتهبد أي شي من راساها بس لحتى يخلي الصحافة تصور

لانو جون كان مخطط يستعمل نفس الاستراتجية الي استعملها بالتسيعانات مع مضاد الفيروسات

يعني رح يحكي بالصحافة عن المشورع، لحتى تجي ناس تسثمر بالمشورع وياخدوا الفلوس

وخلال هي الفترة جون كان شبه مسيطر على المنطقة والناس وسكان المنطقة كلهم من صفه

لانو كان يشغلهم عنده مقابل أجور أعلى بكثيير من الأجور المحلية، وحتى أنه جاب أشخاص مجريمين ومسلحين لحتى يصير حراسه الشخصيين!

القرية الي كان عايش فيها جون كان اسمها “كارماليتا” ومن كتر ما كانت نفوذه كبيرة في هي القرية كان يطلع يمشي بالشوارع هو وحراسه المسلحين، ويعملوا أي شي بيخطر على بالهم بالناس

ومافي أي شخص ممكن يتعرضله لانو حرفياً كان مشتري الكل بفلوسه

لما العالمة أليسون شافت كل هالأشياء خافت من الموضوع وقررت أنها تنسحب من الشغل معه

لما كانت قاعدة بتحكي معه بالموضوع وقالتها أنها رح تترك المشروع، قدملها حبتين المفروض انهم يكون مسكن وكاسة عصير، لانو وقتها كان جايليها صداع

اليسون كانت تدعي أنه جون خدرها واغتصبها ولكن بنفس الوقت هي ما بتتذكر الاحادث

كل الي بتتذكره أنها غابت عن الوعي ولما صحيت، كانت عارية!

رجعت على أمريكا وحكت قصتها للناس وللشرطة ولكن الشرطة ماكانوا قادرين يوصلوا إلى جون

فيديو جون ينفي القضية!

والآن وصلنا إلى المرحلة الي تم اتهام جون ماكفي بالقتل!

على الرغم من أن جون ماكفي كان يصرف جزء كبير جداً من ثروته على حمايته وحراسته الشخصية

إلا أنه في يوم من الأيام في شخص قدر يقتحم بيته ويسرقه ويهرب بدون ما يحس عليه

بعد فترة وصله خبر أنو الحرامي هو شخص أسمه ديفيد، ف طلب من رجاله أنهم يجمعوله مجموعة زعران يخطفوا ديفيد ويعملوله فركة أدن

هيك قتلة خفيفة عالماشي لحتى يتربى

بالفعل هاد الشي صار، والزعران وصلوا ل ديفيد واخدوه قتلوه قتلة ما كانت خفيفة أبداً، وبعدين رومه بالشارع قادم كل الناس

الناس الي شافوا ديفيد اسعفوه فوراً ولكن ديفيد كان داخل في غيبوبة من أثر الضرب الي انضربه ومات بعد 3 أيام

على الرغم من أنو كل الناس كانت عارفة أنو جون هو الي ورا الجريمة هي ألا أن الشرطة ما عملت أي شي

وهي ماكانت الجريمة الوحيدة الي كان جون متهم فيها

بعد فترة قصيرة جداً، في شخص أسمه” غريغ فاول” تقاعد من شغله واجا لحتى يقضي عطلته في هذه القرية الجميلة

ولكن كان كل ما يمشي على الشاطئ يتعرضوله كلاب جون ويعضوه ويخربوا عليه الجو.

لان الشي هاد تكرر أكتر من مرة غريغ راح لعند ماكفي وقال له اذا ما بتشيل كلابك من الطريق أنا رح اسمملك ياهن واقتله

بعد فترة جداً قصيرة فعلاً، كلاب جون ماتوا مسمومين، والشخص الوحيد الي كان في بال جون هو جاره غريغ، لانو بكل بساطة غريغ اجا وبلسانه قاله أنه رح يسممهم!

فيديو

يوم واحد بعد مقتل كلاب جون، بيتم العثور على غريغ مقتول بطلق ناري في رأسه

والشخص الوحيد المتهم كان جون! وهالمرة الدنيا كلها قلبت عليه وصاروا يحكوا عنه بالأخبار ويتهموه بشكل مباشر بجريمة القتل هي

بسبب الاتهمات هي كلها اضطر جون أنه يغادر بليز كالعادة لحتى يهرب من القضية هي

وبعد ما طلع من بليز، صرح للعموم وقال أنو هو مادخله بقصة مقتل جاره غريغ

بل الحقيقة هي أنو حكومة بليز كانت عم تحاول تقتل جون ولكن قتلت جاره غريغ بالغلط لذلك هو قرر يترك البلد

في سنة 2016 شركة اسمها شو تايم عملت فيلم وثائقي عن حياة جون الخطيرة، وداخل هاد الوثائقي جابوا موظفين سابقين كانوا يشتغلوا عند جون واعترفوا انه كان يدفعلهم مصاري لحتى يساعدوه في ارتكاب الجرائم

وأكدوا أن جون بالفعل متورط في قتل جاره غريغ

بعد ما انتشر الفيلم وكل الناس قلبت ضد جون مرة ألف، جون جاب نفس الأشخاص الي شهدوا ضده في الفيلم والثائقي

وطلعلوا على قناة جون اليوتيوب الرسمية، وقالوا ان الشو تايم كان دافعلهم فلوس حتى يحكوا هاد الكلام وأنهم حكوه غصب عنهم، والكلام الي حكوه كله غلط

🤯

والآن جون ما بيقدر يضل في بليز لانو عليه قضايا

لذلك هرب من بليز إلى بلد مجاور اسمه “غواتامالا” وطبعاً دخل على هي البلد بطريقة غير شرعية أو تهريب يعني لازم يضل متخبي

أول ما وصل على غواتامالا في شخص عمل معه مقابلة وتصور معه ونشر الصورة

من سوء حظه انو بال”ميتا داتا” أو بمعلومات الصورة كان ظاهر عنوانه بالظبط

فأول ما الشرطة في غواتامالا شافت الصورة وعرفوا مكانه اقتحموا داهموا بيته واعتقلوه لانو شخص مطلوب دولياً، وكانوا مخططين أنهم يبعتوه على بليز لحتى يتحقق معه في مقتل غريغ

ولكن تدخل محاميه في الوقت المناسب وقالله أنه ممكن يعمل طعن بالقرر هاد وما يخليهم يسفروه على بليز، ولكن محتاج وقت

الشرطة اعتقلت جون في ساعات الصباح المبكر والمحامي قاله أنو قرار الطعن رح يكون جاهز ومقدم للمحكمة الساعة 3 العصر، فحاول أنك تضيع وقت وما تخليهم يسفروك لبين ما تصير الساعة 3

فيديو الاعتقال

أول فكرة خطرت على بال جون هي أنه يمثل أنه اصيب بجلطة وداخ ووقع بالأرض وغاب عن الوعي

بالفعل حاوولوا يسعفوه وأخدوه للمشفى وهو بألاصل ما فيه شي عم يمثل بس لحتى يضيع وقت

لبين ما تصير الساعة 3

لما صارت الساعة 3 قلهم خلص أنا تحسنت مافي داعي أبقى بالمشفى

والطعن الي قدمه المحامي نجح وبدل ما يسفروه على بليز ويتحقق معه بتهمة القتل رجعوه على امريكا وصار حر وطليق مرة تانية ونفد بجريمة القتل الي ارتكبها

وهاد الحكي كان في شهر دسيمبر سنة 2012

وفي هي الفترة جون تعرف على أمرأة وتزوجها وفتح قناة على اليوتيوب وبدأ ينشر فيها محتوى

وبهي الفترة جون رجع حسن صورته قدام الناس، وصارت البرامج التلفزيونية يعملو معه مقابلات على أساس انه شخص خبير

وصار يعمل مؤتمرات واشياء كويسة لدرجة أنو الناس نسيت أنه مجرم وهرب من جريمة قتل

وفي سنة 2016 ترشح إلى رئاسة الولايات المتحدة الأمريكية!

وبعدها صار يكسب فلووسه من عمليلات نصب جديدة في العملات الرقيمة

هلأ خلينا نرجع شوي، لجريمة القتل الي كان متهم فيها

أهل غريغ ماكانوا حابين أنهم يسكتوا عن حقهم ، ورفعوا قضية على جون في أمريكا بما أنه هرب من بليز

وبالفعل المحكمة الأمريكية استجابت لطلبهم وحكموا على جون بأنه يدفعلهم مبلغ 25 مليون دولار كتعويض

وطبعاً جون ما دفع ولا دولار وكان يدعي أنه مفلس ومامعه هالمبلغ

عاش كم سنة بدون ما يصير معه أحداث كبيرة ولكن في سنة 2020 رجع جون هرب من أمريكا

وهالمرة هرب لان بكل غباء نشر فيديو وقال أنا صارلي 8 سنين ما دفعت ضرائب للدولة وما عندي نية أدفع أصلاً

فالحكومة الأمريكية شافت هاد الفيديو وقرروا يلاحقوه قانونية، لذلك هرب من أمريكا مرة تانية

والطريقة الي هرب فيها هي أنه أخد سفينية عباها أسلحة ومخدرات واكل وهرب فيها

وصار يفتل بالعالم

اختفى جون لفترة قصيرة وانقطعت اخباره لحد مافجأة في يوم 6 أكتوبر سنة 2020 السلطات الأسبانية اعتقلوا جون

وسجنوه، لانه شخص مطلوب دولياً، ف سجنوه فترة مؤقتة لبين ما يمشوا الاوراق ويرجعوه على أمريكا

في هي السنة كان عمره 75، وكان عارف أنه اذا راح على أمريكا وانسجن مارح يطلع من السجن لاخر عمره

لذلك انتحر داخل زنزانته في اسبانيا قبل ما يرتحل على أمريكا

بعد ما انتشر هاد الخبر، طلعت زوجة جون وقالت أنه زوجها مستحيل ينتحر، وأن السلطات الأمريكي هي الي قتلته وهي القصة كلها مؤامرة

حتى أنو جون نفسه في يوم من الأيام كان ناشر على التويتر تغريدة بيقول فيها أذا قالولكم أني انتحرت فلا تصدقوهم أنا ما بنتحر

وهاد الشي خلا النظريات حو مقتله تزيد أكتر وأكتر

والنظريات الي حرفياً كتيييرة وبتحتاج فيديو\ مقال تاني مخصوص لحتى نغطيها

لانو كمان في بعض النظريات بتقول أنو والده الي مات لما كان عمره 12 سنة يكوون هو الي قتله

فيا ترى أيش رايكم في القصة هي وهل تشوفوا أن جون مذنب ولا لا؟